Toma Zdravković smatra se kraljem kafanske pjesme. Iako je od njegove smrti prošlo trideset godina, njegove pjesme su i dan-danas najveći kafanski hitovi.
Njegove pjesme nose posebnu emociju i vrijednost jer ih je sam i pisao.Većinu pjesama Toma Zdravković je posvetio ženama koje je volio piše Grand.online.
Danka, Ljiljana, Branka, Nada, Sanja, Jelena… samo su neke od žena koje su njegovim pjesmama opjevane. Toma je svakoj svojoj ljubavi posvetio pjesmu, ali o svojoj najvećoj ljubavi nikad javno nije govorio.
Toma Zdravković – Najtužniju pjesmu posvetio svojoj prvoj ljubavi
Pjesma “Buket belih ruža” inspirisana je Slavicom, djevojkom u koju je Toma Zdravković bio smrtno zaljubljen, a koja je umrla i prije nego što je napunila 20 godina.
Tomina prva ljubav je iz Travnika
Toma je Slavicu (koja je inače iz Travnika) upoznao u Tuzli, tokom nastupa u hotelu “Bristol”. To je bila ljubav na prvi pogled.
Kada je otišao u Beograd da pjeva u jednom baru na Terazijama, njegovoj prvoj probi prisustvovali su fudbaleri Dragoslav Šekularac i Zoran Miladinović.
Kako je i sam Toma pričao, njih dvojica su mu se podsmijavala, što ga je poprilično demolarisalo, te nije ni primjetio da njegova Slavica sjedi sa Zoranom. Tada je shvatio da nešto nije u redu i srce mu je bilo slomljeno.
“Pred cijelim društvom rekla je da mora da obiđe neke prijateljice. Šta sam mogao nego da se složim. Vratio sam se u pustu sobu hotela ‘Balkan’, a ona se pojavila tek poslije ponoći”, pričao je kasnije Toma o krahu svoje prve velike ljubavi.
Da preboli Slavicu Tomi je pomogla Olgica, kojom se i oženio. Ipak, brak nije potrajao. Kada ga jednom na Svetom Stefanu dočekao telegram u kome je pisalo da je Slavica na samrti, a on zbog zakazanih nastupa nije mogao da je vidi posljednji put, napisao je pjesmu “Buket belih ruža”, koju je posvetio njoj.
Jedina supruga kojoj je posvetio pjesmu
Nada je jedina supruga kojoj je Toma posvetio pjesmu. Toma je Nadu upoznao u Budvi 1972. godine, nakon čega su se ubrzo vjenčali.
Međutim, ni ovaj brak nije potrajao, a on je nakon razvoda bio očajan. Kako je ispričao njegov brat Novica, Toma deset dana nakon rastanka od Nade nije izlazio iz kuće. Opijao se, iako mu je zdravlje već bilo ozbiljno narušeno.
Potom je otišao za Njemačku, gdje je proveo pet godina. Poslije Njemačke je uslijedila Kanada, pa Amerika, gdje je upoznao Gordanu, koja je s njim ostala do njegove smrti.
Pjesma “Danka” posvećena poznatoj voditeljki
Jedna od najpoznatijih kafanskih pjesama “Danka”, posvećen je čuvenoj voditeljki TV Dnevnika – Danki Novović. Toma je jednog jutra pun naboja probudio brata Novicu i rekao mu: “Jao, kakvu sam pjesmu napisao! Zove se ‘Danka’.”
Voditeljka ovom pjesmom u početku nije bila nimalo oduševljena. Naprotiv. Kada joj je Toma poslao buket od sto karanfila, ona ih je razdijelila komšijama.
“Bila sam ljuta. Nisam htjela da govorim s njim. Kasnije sam shvatila da je malo žena kojima je, s toliko emocija, otpjevana tako lijepa pjesma. Vjerovatno je Toma, ne vjerovatno nego sigurno, mene volio. Bio je možda malo zaljubljen, a to je bila njegova inspiracija. Na jednom dočeku Nove godine, kada je zapjevao tu pjesmu, prišla sam mu, izljubila ga i izgrlila. Bio je sretan kao dijete”, pričala je kasnije Danka Novović.
Pjesma “Za Ljiljanu” napisana za poznatu glumicu
Još jedan kafanski hit za sva vremena, “Za Ljiljanu”, nasto je 1982. godine, kada je Toma Zdravković na snimanju serije “Doktorka na selu” upoznao glumicu Ljiljanu Blagojević. Dugo se nije znalo ko je Ljiljana kojoj je Toma posvetio ovu pjesmu, dok njena kćerka Kalina Kovačević nije u jednoj emisiji otkrila da je inspiracija bila njena majka.
“Tačno je. Stihovi te numere posvećeni su upravo meni. Vjerovatno sam mu bila draga i simpatična, pa sam ga inspirisala da napiše ‘Za Ljiljanu’”, potvrdila je glumica kasnije u jednom intervjuu.
“Jelena” inspirisana suprugom Tominog brata
Pjesma “Jelena” nastala je zahvaljujući supruzi Tominog brata Novice. Naime, ova pjesma je nastala kada su se Novica i ona posvađali, zbog čega je on patio i žalio se bratu u kafani, gde je Toma stihove napisao upravo u kafani, i to na salveti.
Kafanske pjesme Tome Zdravkovića koje su neprolazne
Iako su najveći hitovi Tome Zdravkovića posvećeni ženama koje je volio, nisu samo oni obilježili njegovu karijeru. On je pjevao i pisao o duši i patnji. Bio je pjevač tuge. Zato su njegove pjesme sinonim za kafanu decenijama unazad.
Još neke kafanske pjesme koje je Toma Zdravković napisao i otpjevao su “Svirajte noćas samo za nju”, “Umoran sam od života”, “Da l’ je moguće”, “Tužno leto”, “Dva smo sveta različita”, “O, Ciganko moja”, “Kafana je moja istina” i mnoge, mnoge druge.
